Björn Bjarnason, fyrrverandi ráðherra Sjálfstæðisflokksins, heldur því fram að ESB-umsókn Íslands sé sjálfdauð. Í pistli á Evrópuvaktinni bendir Björn á að Jean-Claude Juncker, nýkjörinn forseti framkvæmdastjórnar ESB, sé búinn að loka á frekari stækkun ESB næstu fimm árin, til 2019. Þá rifjar Björn það upp að Össur Skarphéðinsson hafi afhent aðildarumsókn Íslands árið 2009 og tók Carl Bildt, utanríkisráðherra við henni.
„Jean-Claude Juncker segir í raun við ríkisstjórn Íslands sem hefur umboð til ársins 2017: Það verður ekkert talað við ykkur!
Brusselmenn segja í raun við Íslendinga: Þið þurfið ekkert að afturkalla umsóknina, hún er sjálfdauð!
Carl Bildt, utanríkisráðherra Svía, sem tók við umsókninni úr hendi Össurar Skarphéðinssonar fyrir fimm árum, tístir á Twitter: Ekki loka á Íslendinga, ef þeir skyldu skipta um skoðun!
Carl Bildt er eini stjórnmálamaðurinn í Evrópu sem blæs í glæður hinar kulnuðu umsóknar Íslands.
ESB-umsókn Íslands hefur orðið sjálfdauð í Brussel – hvað á að afturkalla? Um hvað á að greiða þjóðaratkvæði fyrir þingkosningar á Íslandi árið 2017?”
Björn lýkur skrifunum með góðlátlegri hæðni:
„Er ekki tímabært að snúa sér alfarið að öðrum, meira aðkallandi utanríkismálum Íslands? Til dæmis landgræðslu?”