„Málefnalegu framlagi samfylkingarforkólfa til ESB-umræðnanna eru engin takmörk sett,” skrifar Björn Bjarnason í dagbókfærslu á heimasíðu sinni. Þar vísar hann til sérkennilegrar fésbókarfærslu Árna Páls Árnasonar, formanns Samfylkingarinnar um norska jólatréð á Austurvelli.
Björn rifjar upp að Össur Skarphéðinsson hafi sem utanríkisráðherra oft talað illa um norska stjórnmálamenn og t.d. talið þá „neyða ESB til óhæfilegrar hörku í makríldeilunni”:
„Össur gefur til kynna í bók sinni Ári drekans að Norðmenn hafi viljað spilla ESB-viðræðunum hans.”
Síðan vitnar Björn í skrif Árna Páls á fésbók í tilefni af ákvörðun borgaryfirvalda í Osló að gefa Reykvíkingum ekki fleiri jólatré á Austurvöll. Þetta telur formaður Samfylkingarinnar vera áfellisdóm yfir Evrópustefnu ríkisstjórnarinnar og skrifar:
„Norðmenn og Færeyingar tóku náttúrulega ekkert mark á Evrópustefnunni og gerðu makrílsamninga sín á milli og við ESB án þess að láta Ísland vita. Og eins og það væri ekki nóg, þá bætist þetta við. Vinátta Norðmanna við Ísland er ekki einu sinni eins jólatrés virði, í augum bæjaryfirvalda í Osló.“
Björn Bjarnason kemst að niðurstöðu sem vitað var til í upphafi:
„Málefnalegu framlagi samfylkingarforkólfa til ESB-umræðnanna eru engin takmörk sett.”
