Jafnréttisstofa eyddi 441 þúsund krónum á síðasta ári í leigubílakostnað, að því er Morgunblaðið greinir frá og vitnar til ríkisreiknings 2013. Átta manns vinna hjá Jafnréttisstofu. Í frétt blaðsins segir að Kristín Ástgeirsdóttir, framkvæmdastjóri Jafnréttisstofu, sé ekki með bílpróf en þurfi að ferðast mikið. Í viðtali við Morgunblaðið segir Kristín:
„Ég þarf að ferðast mjög mikið í starfi og er ekki með bíl til umráða, þannig að ég þarf ansi oft að taka leigubíl, t.a.m. þegar ég fer út á flugvöll og frá flugvellinum og á milli fundarstaða. Kostnaðurinn er samt ekki bara bundinn við mig, þó að hann sé það að mestu. Ég er nefnilega ekki með bílpróf og hef aldrei komið því í verk að taka bílprófið.“
Geir Ágústsson er ekki ánægður með þessa eyðslu á almannafé og leggur til nokkrar lausnir:
- Að aðrir en bílsprófslausi yfirmaðurinn sæki fundina.
- Að fundir fari fram á Skype.
- Að yfirmanninum sé skipt út fyrir annan með bílpróf.
- Að Jafnréttisstofa sé lögð niður og fundir hennar þar með.
- Að fólk noti mikið lofaða strætisvagna í stað leigubíla.
- Að aðrir starfsmenn – þeir með bílpróf – skutli fundargestum á milli funda. Þeir eru varla að gera eitthvað merkilegt hvort eð er.
- Að fundir séu haldnir í húsakynnum stofunnar. Það hlýtur að vera upplagt fyrir stofnun sem heitir “stofa”, ekki satt?
- Að fundum sé safnað í tíma og rúmi saman þannig að ferðakostnaður vegna þeirra sé sem minnstur.