„Það er eins og þjóðarskútan sé stjórnlaus,” skrifar Styrmir Gunnarsson, fyrrverandi ritstjóri Morgunblaðsins í pistli á Evrópuvaktinni og bætir við að brúin sé tóm.
Í stuttum en harðorðum pistli segir Styrmir að enginn viti hver stefni og það sem verra sé:
„Engir af kjörnum fulltrúum þjóðarinnar virðast hafa hugmyndir um hvert eigi að stefna.
Það á ekkert síður við um stjórnarandstöðu en stjórnarliðið.
Ekkert er rætt um meginmál þjóðarinnar.
Enginn ræðir um aðildarumsóknina.
Enginn ræðir um kröfuhafana í þrotabú bankanna.
Kjarasamningar stefna í botnlaust fen.
Efnahagur helztu nágranna- og viðskiptaþjóða er í kreppu. Það þýðir að bakslag getur verið yfirvofandi í efnahagsmálum Íslendinga.”
Styrmir lýkur pistlinum með því að spyrja:
„Til hversu eru menn að bjóða sig fram til þjónustu í þágu þjóðarinnar ef þeir sýna svo enga tilburði til að veita þá þjónustu?”